三十歲唔結婚，就會死（上）
我叫阿花，今年二十九歲，未婚。
更準確地講，係二十九歲零三百六十四日，聽日我就三十歲，我就會死。
2100年，一種超智能晶片面世，愈嚟愈普及，直至強制每個嬰兒腦部都要植入晶片，監測所有行動。
然後，政府設定規例，將大家嘅人生安排好。
每人畢業後，就要搵工，如果搵唔到，政府會按專長分配工作，每份工嘅人工都係一樣嘅，按年資提升。
工作後，大家就要拍拖結婚，政府會分配住屋。
如果到二十八歲都未有對象，可以去公營配對公司進行Speed Dating。
總之，所有人都要喺三十歲前結婚。
仲有，結婚後要生2-3個小朋友，生完第三個就要去結紮。
一切一切，都由晶片去監測。
如果出現嚴重違規，例如唔肯返工、三十歲唔結婚、婚後嘗試避孕、虐待兒童……晶片會喺腦裡面爆炸，馬上死亡。
唔係靠嚇，我有幾次出街，都見到有人突然死咗，只係唔知佢哋衰咩。
有咗晶片之後，社會和諧咗好多。
所有人嘅人工都一樣，住嘅地方都一樣大，亦都冇機會上進，自然冇爭執。
而且，一旦犯下「破壞社會和諧」嘅罪行，就會直接被晶片殺死，冇人敢搏。
但我唔開心，我覺得好悶。
或者我天生就係所謂嘅「藝術家性格」，我想創作，我想睇新嘢。
政府認可嘅工作裡面，都有一份工叫「作家」，每個月都要交指定數量嘅作品。
我覺得，佢哋嘅作品好似工廠製作嘅罐頭一樣，只有生產日期係唔同。
畢業後，我都有申請成為作家，但我嘅中文成績唔夠好，最後我被分派為一個文員。
我嘅工作重覆又重覆，冇一絲樂趣可言。
按照晶片規定，唔係作家嘅成年人，都冇權創作文章。
我唯一嘅愛好，就係放假嗰陣，去睇吓嗰啲作家嘅新作品，然後合埋眼幻想，假如當年我可以成為作家，我嘅作品一定好過佢哋。
廿九歲，我忽然意識到，自己已經去到結婚嘅deadline。
我參加咗幾次Speed Dating，每個男人都想同我結婚，唔係因為佢哋有幾欣賞我，而係佢哋都係廿八、九歲，唔結婚就會死，所以佢哋想同任何一個正常女人結婚。
可惜，我接受唔到，哪怕為咗生存，我都冇辦法嫁一個面目模糊嘅男人。
我知道，過咗今晚，我就三十歲。
三十歲唔結婚，就會死。
時間一分一秒咁過去，午夜十二點，我冇死到。
我幾乎懷疑我個鐘壞咗，我彈起身上網，確定已經到咗第二日。
點解晶片冇殺我？我惴惴不安咁拎起支筆，寫咗幾句對社會制度不滿，要求取消晶片嘅說話。
跟住，我冇死到。
我再三試探，確定咗一件事，我嘅晶片壞咗！
即係話，我可以做晒所有違規嘅行為，而唔驚被晶片殺死。
從今日起，我就係自由㗎啦。
我懷住興奮嘅心情瞓著咗，第二朝起身，阿媽打嚟：「你同你老公ok嗎？」
我差啲想答「我未結婚」，話未出口，我成個人醒一醒。
點解阿媽唔係問我結咗婚未？因為三十歲未結婚就會死，我既然生存緊，就代表我應該結咗婚。
連結婚嘅對象都差唔多，喺晶片監控下，大家都唔衰得去邊，所以阿媽甚至冇興趣問我老公係咩人。
或者，另一個原因係，阿媽都唔係咁關心我。
逼於無奈地結婚，再逼於無奈地生出嚟嘅女，唯獨感情，唔可以逼於無奈地產生。
佢盡咗責任去養大我，只係大家一向都冇咩交流。
我意識到，我唔可以畀任何人知道，我嘅晶片壞咗。
一旦被舉報，政府一定會同我裝個新嘅晶片，到時呢種千年難得一遇嘅自由，就唔再屬於我。
所以，我要假裝，我嘅生活仲喺晶片控制之下。
我答：「ok啊，我哋幾好。」
「咁就好啦。」阿媽講完就收咗線。
下集：https://bit.ly/2WgrapQ
將專頁設定為「搶先看」/ "See first"，最新故仔馬上睇！
殺手直播：https://goo.gl/9Ctewy
老婆變成屍體後：http://bit.do/frEuY
#短故 #短篇 #小說 #陳美濤 #廣東話 #粵語 #tomatochan #三十歲唔結婚就會死
Search